ABŞ-ın Los-Anceles şəhərində keçirilən 77-ci Primetime Emmi mükafatlandırma mərasimində aktrisa Hanna Einbinder çıxışı ilə diqqət çəkib. “Hacks” serialındakı roluna görə “ən yaxşı köməkçi qadın aktrisa” nominasiyasında qalib gələn yəhudi əsilli aktrisa səhnədəki təşəkkür nitqini “Fələstin azad olacaq, lənətə gəlsin ICE” sözləri ilə tamamlayıb.

Medialoq.az türk mediasına istinadən xəbər verir ki, Einbinder daha sonra jurnalistlərə açıqlamasında yəhudi kimliyinin İsrail dövlətindən ayrı olduğunu vurğulayıb və Qəzzadakı vəziyyətin onu dərin təsirləndirdiyini deyib. O, həmçinin sənətçilərin dəstəklədiyi “Artist4Ceasefire” təşəbbüsünün nişanını da üzərində daşıyıb.

Qeyd edək ki, dünyanın tanınmış aktyor, rejissor və prodüserləri — Olivia Colman, Mark Ruffalo, Riz Ahmed, Tilda Swinton, Javier Bardem, Susan Sarandon, Yorgos Lanthimos və başqaları — İsrail film qurumları ilə əməkdaşlıq etməməklə bağlı bəyanatı imzalayıb. Bu sənəd qısa müddətdə 4 mindən çox dəstəkçi toplayıb.

Medialoq.az / Səkinə Yusifova