Filippinin şimalını vuran “Ragasa” super tayfunu bölgədə kütləvi təxliyələrə və uçuşların ləğvinə səbəb olub. Güclü yağış və fırtına nəticəsində 10 mindən çox insan məktəblərə və təxliyə mərkəzlərinə yerləşdirilib.

Medialoq.az türk mediasına istinadən xəbər verir ki, meteoroloji xidmətin məlumatına görə, tayfunun mərkəzində küləyin sürəti saatda 215 km-ə, bəzi yerlərdə isə 265 km-ə çatıb. Cagayan əyalətində yüksək dalğaların sahillərə çırpıldığı, elektrik kəsintiləri və torpaq sürüşmələri riskinin artdığı bildirilib.

Prezident Ferdinand Marcos bütün dövlət qurumlarının yardım üçün hazır vəziyyətdə olduğunu açıqlayıb. Paytaxt Manila da daxil olmaqla Luzon adasında dərs və işlər dayandırılıb, 20-dən çox daxili aviareys, eləcə də bərə səfərləri ləğv olunub.

Çin rəsmiləri Şençjendə 400 min nəfərin təxliyəsini planlaşdırdıqlarını bildirib. Bir neçə əyalətdə daşqınlara qarşı fövqəladə tədbirlər görülür.

Honq Konq hava limanları 36 saatlıq bağlanma elan edib. Şəhərdə mağazalarda uzun növbələr yaranıb, əsas ərzaq məhsullarında qıtlıq müşahidə olunur. Makao və Çjuhaydə məktəblər bağlanıb, təxliyə planları işə salınıb.

Vyetnam Müdafiə Nazirliyi ordunu fırtınaya qarşı hazırlığa çağırıb. Tayvanın şərq sahillərinə güclü yağış gətirəcəyi gözlənilən tayfun səbəbindən 146 uçuş ləğv olunub, 900-dən çox insan dağlıq bölgələrdən köçürülüb.

Medialoq.az / Səkinə Yusifova