İran Xarici İşlər naziri Abbas Əraqçi ölkə mediasına verdiyi açıqlamada bildirib ki, Tehran ABŞ-la ədalətə və qarşılıqlı hörmətə əsaslanan danışıqlara yenidən başlamağa hazırdır.

Medialoq.az türk mediasına istinadən xəbər verir ki, Əraqçinin sözlərinə görə, İranla Beynəlxalq Atom Enerjisi Agentliyi (BAEA) arasında 9 sentyabrda Qahirədə imzalanan və əməkdaşlığın bərpasını nəzərdə tutan razılaşma, BMT sanksiyalarının qüvvəyə minməsindən sonra etibarsız sayılıb. Lakin nazir vurğulayıb ki, İran və BAEA arasında əməkdaşlıq tamamilə dayandırılmayıb:

"Qahirə razılaşması hazırda dondurulub. Agentliklə əməkdaşlığı tam kəsmirik, çünki bəzi sahələrdə bu bizim maraqlarımıza uyğundur. Əlaqələr tam bitməyəcək.”

Əraqçi bildirib ki, Avropa ölkələri ilə yeni nüvə danışıqları planlaşdırılmır:

“Hazırda Avropalılarla müzakirələr üçün əsas görmürük. Amma ABŞ-la ədalətli və balanslı dialoqa hazırıq.”

Nazir həmçinin ABŞ-la dolayı yollarla mesaj mübadiləsinin davam etdiyini qeyd edib və münasibətlərdə prinsipial mövqelərinin dəyişmədiyini vurğulayıb:

“Əgər onlar bərabər tərəf kimi, qarşılıqlı maraqlar və hörmət əsasında danışmağa hazırdırsa, biz də bu danışıqlara açığıq. Amma bu, bizə şərt qoymaq anlamına gəlməməlidir.”

Medialoq.az / Səkinə Yusifova