İşığı, qazı kəsməyə gəldilər, ara qarışdı

İşığı, qazı kəsməyə gəldilər, ara qarışdı
«Bu şaxtada, qarda gəliblər ki, tapşırıq var, bu gün işıq, qaz xətləri kəsilməlidir»

Binəqədi rayonu, Xocasən qəsəbəsi ərazisində metro tikintisinə görə plana düşmüş 64 evə kommunal xidmətlərin dayandırılması barədə qərar sakinləri qəzəbləndirib. Sakinlər bildiriblər ki, dekabrın 15-də səhər saatlarından qışın soyuğunda məhəllələri gəzən işıq və qaz idarəsinin işçiləri ilə üz-üzə qalıblar.

BİR NEÇƏ EVİN İŞIĞI, QAZI KƏSİLİB

Ərazidə yaşayan Nəsib Abdullayev:
«Hələ evimizi tərk etməmişik, hələ bunların fırıldaqlarının üstünü sənədlə-sübutla aça-aça gəlirik, bunlarsa gəlib qapılara dirəniblər ki, işığı, qazı, suyu kəsirik».

Sakinlər evlərindən çıxaraq işığı, qazı kəsməyə gələnlərin qarşısını almağa çalışıblar. Bununla belə, idarə işçiləri geri «əliboş» qayıtmayıblar. Bir neçə evin işıq və qaz xətlərini kəsiblər:

«Kim ki, evdə yox idi, evinə gedən qaz, işıq xəttini kəsdilər. Dedilər, bir azdan gəlib suyu, kanalizasiya xəttini də kəsəcəklər. Deyirlər, onsuz da xeyri yoxdur, ya evlərdən könüllü çıxmalıyıq, ya da bir neçə gün ərzində gəlib bütün kommunal xətləri kəsəcəklər. Hətta gündüz imkan verməsək, bunu gecə edəcəklər. Biz də məcburuq ki, növbəylə gecələr kommunal xətlərin keşiyini çəkək».

Əraziyə bir neçə ağır texnika da gətirilib. Sakinlərin deməsinə görə, traktorlar bəzi tikililəri sökməyə gəlsələr də, aranın qarışdığını görən traktorçular sürüb ərazidən uzaqlaşıblar.

«XƏBƏRDARLIQ OLUNANDA HAVA MÜLAYİM KEÇİRDİ»

Binəqədi rayon İcra Hakimiyyətindən bildirilib ki, mənzillərə gedən kommunal xətlərin kəsiləcəyi barədə burada yaşayan ailələrə dəfələrlə xəbərdarlıq olunub. Hətta ərazidəki gediş-gəliş yerlərinə elanlar da yapışdırılıb. Qurum hesab edir ki, sakinlər evlərindən çıxmamaqla ərazidəki söküntü, tikinti işlərinin ləngiməsinə səbəbkar olurlar. «Bəs niyə idarə işçiləri məhz çovğunlu, soyuq havada mənzillərin istilik, işıq xətlərini kəsmək istəyir» sualına qurumdan «onlara xəbərdarlıq olunanda havalar mülayim keçirdi», – deməklə kifayətləniblər.

Keçmiş Motodrom ərazisindəki yaşayış massivinin sakinləri yaxınlıqda tikilmiş «Avtovağzal» metrostansiyasının hazırda inşa edilməkdə olan deposuna görə evlərindən köçürülürlər. Ancaq sakinlər hökumətin təklif etdiyi kompensasiyanın məbləği ilə razılaşmırlar. Onlar hesab edirlər ki, mənzillərinin hər kvadratmetrinə görə 500 manat hesablanması ədalətsizlikdir. Sakinlər etirazlarını bildirmək üçün dəfələrlə ərazidən keçən əsas yolu bağlayıblar. Hökumət təmsilçilərinin məsələyə münasibəti bundan ibarətdir ki, kompensasiya əraziyə uyğun hesablanıb və məbləğ ədalətlidir. ("Azadlıq" radiosu)


Politika.Az



Oxunub: 3356


Loading...




Fikirlər


Şərh bildir
(Şərh yazarkən oxucular dini, irqi, milli ayrı-seçkiliyə yol verməməli, insan şəxsiyyətinə toxunacaq qeyri-etik ifadələr işlətməməli, ölkə qanunvericiliyinə zidd çağırışlar etməməlidir. Əks halda belə şərhlər ya redaktə ediləcək, ya da ümumiyyətlə, sayta buraxılmadan silinəcək.)
  • Anons-Reportaj

  • Bölgə xəbəri

  • Rəsmi

  • Oxucu şikayəti

  • Populyar xəbərlər

  • İdman

  • Dünya

  • Ən çox oxunanlar

    Bu gün
    Bu həftə
    Bu ay
    Bu il