İranın nüvə obyektlərinə qarşı həyata keçirilən son hücumlara baxmayaraq, zənginləşdirilmiş uran ehtiyatlarının bir hissəsi zərər görməyib və hazırda əlçatan vəziyyətdədir.

Medialoq.az türk mediasına istinadən xəbər verir ki, məlumata görə, ABŞ və İsrail əvvəlcə Fordo, Natanz və İsfahan kimi əsas nüvə mərkəzlərinə zərbə endirildiyini və ehtiyatların sıradan çıxarıldığını irəli sürmüşdü. Lakin son dəyərləndirmələr göstərir ki, təxminən 400 kiloqram 60 faiz zənginləşdirilmiş uranın bir hissəsi hücumlara tuş gəlməyib. Uranın hansı obyektlərdə saxlanıldığı barədə ətraflı məlumat verilməyib.

Beynəlxalq Atom Enerjisi Agentliyinin (UAEA) rəhbəri Rafael Qrossi də bu ehtiyatların bir hissəsinin başqa yerə köçürüldüyünü ehtimal etdiklərini deyib. Lakin ABŞ tərəfi bunu rəsmi şəkildə təsdiqləməyib.

Ekspertlər bildirirlər ki, uran ehtiyatlarının tam zərər görməməsi, İranın nüvə potensialının hələ də tam sıradan çıxmadığını göstərir. ABŞ kəşfiyyatı isə məsələ ilə bağlı təhqiqatların davam etdiyini bildirib.

Medialoq.az / Səkinə Yusifova