Pakistanın Bəlucistan əyalətinə bağlı Mastunq bölgəsində sərnişin qatarına bomba hücumu nəticəsində 12 nəfər yaralanıb.

Medialoq.az türk mediasına istinadən xəbər verir ki, Dawn qəzetinin məlumatına görə, dəmir yolu rəsmiləri Peşəvər–Kvetta xətti üzrə hərəkət edən “Caffar Ekspresi”nin hədəfə alındığını açıqlayıb. Məlumata əsasən, Mastunq bölgəsində relslərə yerləşdirilən partlayıcı qurğu işə salınıb, nəticədə qatara qoşulmuş 6 vaqon relsdən çıxıb, onlardan biri aşıb. Həmin vaqonda olan 12 sərnişin müxtəlif dərəcəli xəsarətlər alıb.

Hadisə yerinə təhlükəsizlik qüvvələri göndərilib, yaralılar yaxınlıqdakı xəstəxanalara yerləşdirilib. Dəmir yolu idarəsi hücum zamanı qatarda 270 sərnişinin olduğunu, zərər çəkmiş hissənin təhlükəsizlik yoxlamasından sonra təmir edilərək qatar hərəkətinin bərpa olunacağını bildirib.

Ölkədə silahlı hücumlar əsasən Əfqanıstana sərhəddə yerləşən Xayber Paxtunxva və Bəlucistan əyalətlərində baş verir. Bu bölgələrdə fəaliyyət göstərən silahlı dəstələr, peştun və bəluc etnik qruplarının hüquqlarını müdafiə etdiklərini iddia edərək həm təhlükəsizlik qüvvələrinə, həm də mülki şəxslərə hücumlar təşkil edir.

İslamabad, “Təhrik-i-Taliban Pakistan” (TTP) qruplaşmasının Əfqanıstanda yerləşərək buradan hücumları koordinasiya etdiyini bildirir. Əfqanıstan rəhbərliyi isə bu iddiaları rədd edir. Belucistanda isə əsasən “Bəlucistan Azadlıq Ordusu”nun (BLA) hücumları ön plana çıxır. Qruplaşma bölgənin Pakistandan ayrılaraq Bəluc xalqı tərəfindən idarə olunmasını tələb edir.

Medialoq.az / Səkinə Yusifova