Mütəxəssislər bildirirlər ki, kimyəvi tərkibli paltar yumşaldıcıları parçanı yumşaltmaqla yanaşı, uzunmüddətli istifadə zamanı həm parçaya, həm də dərimizə zərər verə bilər. Bu səbəbdən son illərdə təbii alternativlərə maraq artmaqdadır. Araşdırmalara əsasən, bəzi təbii məhsullar sintetik yumşaldıcılardan daha effektiv və təhlükəsiz ola bilər.

Medialoq.az türk mediasına istinadən xəbər verir ki, ən diqqətçəkən təbii vasitələrdən biri ağ sirkədir. O, həm parça üzərindəki yuyucu qalığını təmizləyir, həm də parçanı yumşaldır. Qoxusuz olması və paltarda xoşagəlməz iy buraxmaması onu gündəlik istifadə üçün əlverişli edir. Paltaryuyan maşının yumşaldıcı bölməsinə bir xörək qaşığı ağ sirkə əlavə etmək kifayət edir.

Digər təsirli vasitə isə hindqozu (kokos) yağıdır. Bu yağ parçaya həm yumşaqlıq, həm də təbii qoxu bəxş edir. Yuyucu ilə birlikdə bir neçə damla hindqozu yağı əlavə etməklə paltarlar həm təmiz, həm də yumşaq qalır.

Bundan əlavə, lavanda yağı da geniş istifadə olunur. Antibakterial təsiri ilə yanaşı, lavanda yağı paltarlara təbii və rahatlaşdırıcı qoxu verir. Bir stəkan suya 10–15 damcı lavanda yağı əlavə edərək bu qarışığı paltaryuyan maşının yumşaldıcı bölməsinə tökmək tövsiyə olunur.

Təbii məhsullarla paltar yumşaltmaq təkcə parçaya deyil, həm də dərimizə zərərin qarşısını alır.
Ağ sirkə, hindqozu (kokos) yağı və lavanda yağı kimi təbii vasitələr:

• Parçanı yumşaq saxlayır,

• Dəridə allergiya və qıcıqlanma yaratmır,

• Kimyəvi qalıq buraxmadan təmizlik və təravət təmin edir.

Bu üsullar həm də ekoloji cəhətdən daha təhlükəsiz sayılır və uzunmüddətli istifadə üçün əlverişlidir.

Medialoq.az / Səkinə Yusifova