Dünya 11:13 06.06.2022

Britaniya Ukraynaya M270 reaktiv yaylım atəşi sistemləri göndərəcək

Britaniya Ukraynanı 80 km məsafədəki hədəfləri vura bilən çox buraxılışlı raket sistemləri ilə təmin edəcək.

Qaynarinfo "Reuters” agentliyinə istinadla xəbər verir ki, bu barədə rəsmi London bildirib

Müdafiə naziri Ben Uolles Rusiyanın taktikası inkişaf etdikcə, İngiltərənin Ukraynaya dəstəyinin də dəyişəcəyini bildirib. 

"Bu yüksək qabiliyyətli çoxşaxəli raket sistemləri ukraynalı dostlarımıza Putin qüvvələrinin şəhərləri yerlə yeksən etmək üçün heç bir fərq qoymadan istifadə etdiyi uzaqmənzilli artilleriyanın vəhşicəsinə istifadəsindən daha yaxşı qorunmağa imkan verəcək”, - Uolles bəyanatında bildirib.

ABŞ prezidenti Co Bayden keçən həftə Vaşinqtonun Ukraynanı M142 Yüksək Mobil Artilleriya Raket Sistemləri və ya HIMARS ilə təmin edəcəyini deyib. Kiyev bu silahlarla Rusiya ərazisindəki hədəfləri vurmayacağına dair zəmanət verib. 

Putin silah tədarükünün "yeni bir şey olmadığını” deyib, lakin ABŞ-ın HIMARS sistemləri üçün daha uzaq mənzilli sursatlar tədarük edəcəyi təqdirdə cavab veriləcəyi ilə bağlı xəbərdarlıq edib.

Nurlan Hüseynov