Sosial şəbəkələrdə mini gizli kameraların satışı ilə bağlı paylaşılan elan müzakirələrə səbəb olub.  “TikTok” platformasında elektron ticarət məqsədilə yaradılmış səhifədə düymə ölçülü kameralar gündəlik əşyalar kimi açıq şəkildə satışa çıxarılıb.
Görüntülərdən də aydın olur ki, çox kiçik ölçüdə olan kameraları müxtəlif əşyaların üzərinə yapışdırmaq mümkündür. Paylaşıma rəy yazan izləyicilər də bu tipli reklamların yolverilməz olduğunu, belə ticarət üsullarının şəxsi həyata qanunsuz müdaxilələrə yol aça biləcəyini qeyd ediblər.

Bu barədə hüquqşünas Rəşad Əliyev Medialoq.az-a şərh verib.
 Onun sözlərinə görə, mini gizli kameraların sosial şəbəkələr üzərindən açıq şəkildə satışı ciddi hüquqi risklər yaradır:
“Azərbaycan qanunvericiliyinə əsasən şəxsin razılığı olmadan onun görüntüsünün və ya səsinin qeydə alınması şəxsi həyatın toxunulmazlığının pozulması hesab olunur. Konstitusiya və “Şəxsi məlumatlar haqqında” Qanun şəxsi həyatın gizliliyini açıq şəkildə qoruyur. Belə qurğuların satışı birbaşa qadağan olunmasa da, onların istifadəsi cinayət məsuliyyəti yarada bilər. Xüsusilə bu kameraların gizli şəkildə yerləşdirilməsi və müşahidə məqsədilə istifadə olunması Cinayət Məcəlləsi ilə cəzalandırıla bilən əməldir. Sosial şəbəkələrdə bu tip reklamların yayılması isə hüquqi boşluqlardan sui-istifadə kimi qiymətləndirilə bilər. Elektron ticarətlə məşğul olan şəxslər satdıqları məhsulun mümkün hüquqi nəticələrini də nəzərə almalıdırlar. Platformalar da belə elanlara qarşı nəzarət mexanizmlərini gücləndirməlidirlər. Çünki bu cür məhsullar şəxsi həyata qanunsuz müdaxilə riskini artırır. İstifadə zamanı törədilən pozuntuya görə yalnız istifadəçi deyil, müəyyən hallarda satışla məşğul olan şəxs də məsuliyyət daşıya bilər”.

Emin Oruc 
Medialoq.az